Abdul Rahman Mohmand - (Rahman Baba)
Researched By: Kabir Mohmand

هجری ۱۱۱۸‑۱۰٤۲

د رحمان بابا د پیژندني دپاره همدومره بس دي چې ټول پښتانه ورته بابا وایي. په پښتوکښي د بابا لقب یا هغو شاهنشو ته ورکړي شوي دي چه د توري او توپک په زور ئې پښتنو ته ملکونه نیولي دي او یا هغوفقيرانو ته ورکړي شوي دي چه نه ئې توره نه ئې توپک او نه ئې زور و، خو د خبرو په سحر ئې د پښتنو د زړونوعالم تسخير کړي داو د هرپښتانه د زړه په تخت ناست پاچهی ئې کړې ده

لکه چه رحمان بابا وایي

د پالنگ او د پیړی حاجت ئې نشته
د یارانو نشستن د زړه په تخت دي

رحمان بابا په ۱۰۴۲ هجري کال د پښتونخوا د پیښور په علاقه په بهادر کلى کښې زیږیدلي دي او د پلار نوم ئی عبدالستار وو که څه هم په قوم مومند دي مگر د رحمان بابا مقام له دینه ډیر اوچت دي چه دي کومي خاصی قبیلی یا کوم ټبرته منسوب شي ، ځکه چه لوي او حقیقي شاعران بين الانساني شخصیتونه لري. رحمان بابا هم دټولو انسانانو دي خو بیا په خاص طور دټولو پښتوبابا دي. دى پخپله هم ځان کومي قبیلې ته نه منسوبوی وایي:

زه عاشق یم سر و کار می دي له عشقه
نه خلیل، نه داودزی یم، نه مومند